Македонски центар за меѓународна соработка - МЦМС

МЦМС, на 16 февруари 2010 година, во своите простории, организираше координативен состанок за предлог-Законот за здруженија и фондации. На состанокот присуствуваа претставници на повеќе граѓански организации.

На координативниот состанок, граѓанските организации требаше да дадат заеднички придонес за подобрување на предлог-Законот за здруженија и фондации.

Присутните дискутираа за повеќе прашања кои се новина во предлог Законот. Од присутните беа истакнати позитивните аспекти како: либерализација на здружувањето за странци и правни лица, можноста за директно занимавање со економски активности, подобрената организациска структура, како и за воведувањето на статусот на организации од јавен интерес што е најголемата новина. Во текот на дискусијата најмногу се разговараше за потребата од подобрување на неколку прашања меѓу кои за непратиското делување, за промената на бројот на основачите на здруженијата, за тоа дали децата можат и под кои услови да бидат основачи на здружение, за намалувањето на основачкиот влог за фондации, за несоодветноста на роковите за известување, за критериумите за стекнување со статус од јавен интерес.

Организациите се договорија сите кои имаат коментари да ги достават до МЦМС во вид на предлог амандмани, а потоа заеднички да се достават до Министерството за правда. МЦМС исто така ќе подготви свое мислење и свои амандмани и истите ќе ги направи достапни до сите заинтересирани организации. Заедно со амандманите, до Министерството за правда ќе бие доставен и  записникот од состанокот.