Македонски центар за меѓународна соработка - МЦМС

Македонскиот центар за меѓународна соработка (МЦМС) ја подготви анализата „Антикорупциска проверка на легислативата на Законот за конфискација на имот во граѓанска постапка“ со која се утврдуваат и обработуваат неколку видови ризици кои се јавуваат поради преклопување на законски одредби, непрецизни дефиниции, вклучување повеќе субјекти во одлучувањето, споделени и нејасни надлежности, дискрециски овластувања, несоодветно регулирани правила на постапката и сл.

Анализата покажува дека отсуствуваат соодветни гаранции кои се однесуваат на граѓаните кои би можеле да бидат засегнати во оваа постапка, отсуствуваат контролни механизми над постапувањето на органите и институциите, како и одредби за ограничување на примената на Законот. Покрај тоа, Законот е исклучително нејасен во многу аспекти, се преклопува со многу други важечки закони и остава впечаток на неумесно креиран концепт, кој изгледа дека не му е до крај познат ниту на законодавецот. На ваквата ситуација се надоврзува исклучително големиот број на посочени ризици од корупција и судир на интереси во самите законски одредби, како и конфузно и кружно регулирање на постапките, надлежностите, па дури и клучните поими и самиот почеток на постапката која е утврдена во Законот.

Конечниот заклучок е дека државата треба да ги унапреди постојните механизми за контрола на имотот и зајакнување на практичната примена на конфискацијата на имот во кривичните постапки, како и во случаите кога не е можно водење кривична постапка, согласно правилата на Законот за кривичната постапка, наместо да посега по револуционерни решенија, кои во оваа форма и во контекст на нашата држава ќе предизвикаат многу повеќе проблеми, отколку што ќе придонесат за надминување на постоечките. Оттука, единствената препорака е законот да се укине пред воопшто да започне да се применува и државата да посвети сериозно внимание и труд за да се овозможи поголема примена на конфискацијата во рамките на кривичните постапки, дури и кога не е можно водење кривична постапка, како и да се зајакне контролата на имотот согласно постоечките законски одредби.

Анализата е изработена како дел од програмата „Граѓаните против корупцијата“, поддржана од УСАИД. Издавач на публикацијата е Македонскиот центар за меѓународна соработка, додека автор е Дарко Аврамовски.