Македонски центар за меѓународна соработка - МЦМС

Во втората недела од својот престој во Македонија, учесниците на проектот „Родум од Македонија“ имаа можност да ги посетат Собранието на Република Македонија и Министерството за одбрана. Домаќин во Собранието им беше пратеникот Павле Саздов. За Наташа, Аарон, Филип и Лукас, како и за креаторот на програмата Питер Далас беше организирана тура низ Собранието која вклучуваше посета на салите каде што се одржуваат комисиски расправи, салата за пленарни седници, Свечената сала и собите со традиционален дрворез. Младите македонски иселеници добија информации за организацијата и функционирањето на Собранието. Обиколката заврши со разговор во кабинетот на пратеникот Павле Саздов кој одговори на сите нивни прашања.

На средбата во Министерството за одбрана тие имаа можност да поразговараат со министерот Зоран Јолевски, поранешен амбасадор на Република Македонија во Соединетите Американски Држави. Учесниците беа заинтересирани за прашања кои се однесуваат на одбраната и безбедноста, тековната криза со мигрантите од Сирија и домашните безбедносни мерки, меѓу-балканската соработка во одбраната и изгледите за членството на Република Македонија во НАТО. Тие дадоа свои мислења за улогата што македонската дијаспора може да ја игра во нивните земји, вклучувајќи и лобирање за поголема поддршка и вклучување на Македонија во меѓународните организации.

„Родум од Македонија“ (Birthright Macedonia) го спроведува Обединетата македонска дијаспора (ОМД) и нејзиниот локален партнер Македонскиот центар за меѓународна соработка (МЦМС). Примарната цел на проектот е младите Македонци кои се родени и живеат надвор од државата да го запознаат нивното културно наследство и да воспостават контакти и пријателства меѓу себе и со нивните врсници во Македонија.