Македонски центар за меѓународна соработка - МЦМС

Со цел да се поттикнат теми од областа на граѓанското општество во организација на Македонскиот центар за меѓународна соработка, беа промовирани три публикации. Станува збор за книгите "Слободата на изразувањето" на авторот м-р Слаѓана Димишкова, новинар во дневниот весник Вечер, кој наедно е и издавач на оваа публикација заедно со Првиот приватен универзитет - Европски универзитет, потоа "Невладиниот сектор како етички коректив на општеството" на м-р Дејан Донев и "Функционирање на економско-социјалниот совет на РМ" на м-р Андон Мајхошев.

Промотор на книгата "Слободата на изразувањето" беше Драган Павловиќ-Латас, главен и одговорен уредник на Вечер и одговорен уредник на телевизија Сител. Тој истакна дека слободата на говорот е основно средство, оружје за се, притоа потенцирајќи дека од остварувањето на ова човеково право зависи и реализирањето на сите останати права.

Во овој дел стана збор и за последниот актуелен случај од слободата на изразувањето, судскиот случај меѓу Љубомир Фрчкоски и Никола Груевски. Фрчкоски беше тужен за колумната објавена во Дневник насловена како "ОКТА визави Кољо дијамантот", во која тужениот навел дека Груевски тогаш како министер "потпишал штетен анекс договор". Инаку, Фрчкоски кој вели дека судските одлуки не се коментираат, ги коментира самиот. Откако беше донесена пресудата со која тој е обврзан да плати околу 30 илјади евра, излезе со коментар за истата, а самиот вели дека пресудите не се коментираат. Контрадикторноста во неговите изјави продолжува, прво кажува едно, а потоа самиот се демантира.

Останатите две публикации ги промовираа д-р Лидија Христова и д-р Александар Димитриев. На причините, зошто МЦМС финансиски го поддржа издавањето на публикациите, се осврна извршниот директор Сашо Клековски. Правата е да се поддржат истражувања на лица кои имаат специјалност во одредени области, а не секој да се прогласува за експерт од сите области; второ, да се промовираат нови имиња со кои ќе се разбранува општествената сцена и дискусијата; трето, МЦМС не се согласува со сите ставови на авторите, но смета дека за квалитетна дискусија потребно е да има различни ставови.

"Слободата на изразувањето" во издание на ВЕЧЕР предизвика најголем интерес.

Извор: Вечер (24.12.2008)