Македонски центар за меѓународна соработка - МЦМС

На 28 септември 2010 година, во Домот на културата во Битола, со промотивна конференција започна спроведувањето на проектот Институционална надградба за координација и поддршка на бизнис активностите во Пелагонискиот плански регион. Проектот е одговорност на Центарот за развој на Пелагонискиот плански регион, а МЦМС ќе ги спроведува обуките за општинската администрација и бизнис секторот.

За Џемаил Елмази, директор на Бирото за регионален развој со овој проект се промовира јавно партнерство во регионот. „Очекуваме интензивирање на активностите, посебно во патната инфраструктура, водоводот, канализацијата и другите проекти за сите општини“, рече тој во своето обраќање на конференцијата.

Од името на градоначалниците на деветте општини на Пелагонискиот регион се обрати Марјан Ристески, градоначалник на Прилеп. „Целта на овој проект е јасна – економски развој на регионот“, рече во своето обраќање Ристески. „Верувам дека по спроведувањето на проектот перспективите на регионот ќе бидат поголеми, фондовите подостапни и инвестициите пореални“, додаде тој.

Целта на проектот е да се воспостават организирани и структуирани тимови за секоја општина и за Центарот кои ќе биде способни да ги координираат и поддржат бизнис активностите во регионот.

„Сите заедно ќе креираме динамичен развој кој ќе биде корисен за сите 240.000 жители на регионот“, рече Емилија Ѓероска, раководител на Центарот за развој на Пелагонискиот плански регион. „Ќе градиме партнерства во текот на цела година за да траат во сите наши следни години.  Сите заедно ќе го направиме Пелагонискиот регион поубаво место за живеење согласно нашата европска визија“, додаде таа.

На конференцијата, Александар Кржаловски, извршен директор на МЦМС зборуваше за методологијата и временската рамка на спроведувањето на активностите.

{slideshare}[slideshare id=5322220&doc=mcms-metodologijanarabotaivremenskadinamikanaproektot-100930043823-phpapp02]{/slideshare}

На конференцијата на присутните им се обратија и Херман Снелдер, директор на МДФ (Управување за развојни фондации) од Холандија и Лазар Неданоски од МЦМС.

Снелдер зборуваше за холандските искуствата во јавно-приватните партнерства и иницијативите за развој на општините.

{slideshare}[slideshare id=5322219&doc=mcicmdf-dutchmunicipalitiesineconomicdevelopmentandppp-100930043758-phpapp01]{/slideshare}

Неданоски зборуваше за привлекувањето на инвестиции во регионот.

{slideshare}[slideshare id=5322221&doc=mcms-privlekuvanjeinvesticiizabiznisitevoregionot-100930043841-phpapp02]{/slideshare}

Проектот е финансиски поддржан од Бирото за регионален развој како дел од програмата за рамномерен регионален развој на Министерството за локална самоуправа на Република Македонија. Средствата се обезбедени од буџетот на Република Македонија и општините во Пелагонискиот плански регион: Битола, Прилеп, Ресен, Крушево, Демир Хисар, Новаци, Могила, Долнени и Кривогаштани.