Македонски центар за меѓународна соработка - МЦМС

На 18 и 19 јуни 2010 г. во Нови Сад, Србија се одржа регионална конференција „Граѓанско градење мостови“.  На конференцијата учествуваа претставници на 63 граѓански организации од Унгарија, Србија, Македонија, Хрватска, Босна и Херцеговина, Косово и Црна Гора.

Конференцијата беше замислена како поврзување на унгарските граѓански организации со организациите од земјите на Западен Балкан, а во пресрет на унгарското претседавање со Европската Унија.  Во воведните излагања на конференцијата беше даден преглед на напредокот на секоја од земјите од Западниот Балкан на патот кон Европската Унија, како и за постоечките иницијативи за регионална соработка на граѓанските организации.  Во овој дел на конференцијата беше претставена и Балканската мрежа за развој на граѓанското општество.

Даниела Стојанова од МЦМС, ја презентираше состојбата на граѓанското општество во Македонија, во панелот посветен на состојбата со граѓанскиот сектор во Западен Балкан. Таа ги информираше присутните за историскиот развој, моменталната состојба и предизвици на граѓанските организации, како и за можностите за регионална соработка. Во последниот панел беа презентирани приоритетите на унгарското претседателство со ЕУ, особено во однос на проширувањето и Западниот Балкан, по што учесниците усвоија декларација.

Конференцијата ја организираа канцелариите на Европскиот фонд за Балканот и Асоцијацијата на агенции за локален развој во Србија и Европска куќа од Унгарија.