Македонски центар за меѓународна соработка - МЦМС

На 26 август 2009 година во Министерството за правда се одржа средба меѓу министерот за правда г. Михајло Маневски и група граѓански организации. Целта на средбата беше информирање за процесот на подготовка на Законот за здруженија и фондации, како и за прашања за поширока соработка на министерството и граѓанските организации.

Министерот Маневски го истакна задоволството од постигнатиот напредок и од досегашната соработка со граѓанските организации при подготовка како на Законот за здруженија и фондации, како и на други важни закони притоа истакнувајќи ги измените и дополнувањата на Законот за пристап до информации од јавен карактер, предлог Законот за бесплатна правна помош, Изборниот законик, Законот за кривична постапка и сл.

И претставниците на граѓанските организации ги истакнаа нивните видувања на досегашната соработка, напредокот во подготовката на одредени закони, а исто така имаа и одредени прашања од сферата на нивниот интерес.

Во однос на Законот за здруженија и фондации, Сашо Клековски како член на работната група ги сумираше клучните измени кои според него ќе доведат до еден од најлибералните и најсовремени закони кој се заснова на најдобрите искуства од земјите од Европа, но и на препораките на релевантни меѓународни институции, на конвенции кои ги потпишала Република Македонија, и на одредени домашни политики и стратегии.

Накусо, тој ги изнесе клучните промени од новиот закон кои се однесуваат на поголема промоција на слободата на здружување (можност да основаат здруженија се дава и на правни лица, на малолетници и на странци), на појаснување и поедноставување на управувањето на здруженијата и фондациите, подобрени се одредбите за финансирање на здруженија и фондации, а истовремено воведени се и одредби за начинот на остварување на контролата во здруженијата и фондациите. На крај истакна дека најважната новина во Законот е воведувањето на нова глава која се однесува на статусот на јавен интерес.

Според Сашо Клековски донесувањето на овој закон е од особена важност и поради фактот што потоа ќе може да се направат усогласувања, измени и допрецизирање на други закони кои што се од голема важност за одржливоста на граѓанскиот сектор и кои што се предвидени со Стратегијата за соработка на Владата со граѓанскиот сектор. Тоа воедно ќе значи и придонес кон понавремено спроведување на Стратегијата.

Дел од коментарите и прашањата кои ги поставија другите учесници се однесуваа на услогласеноста на овој закон со законот за инвалидски организации каде што минимумот потребен за основачи на ваквите организации е 40 лица што е во спротивност со одредбите од овој закон.

Исто така финансирањето на граѓанските организации е едно од клучните прашања кои треба да бидат заеднички разгледувани од страна на граѓанските организации и Министерството за правда и Министерството за финансии.

За дел од учесниците важно е навременото информирање за подготовката на одредени закони, со цел да може од нивна страна да се дадат соодветни и издржани мислења и анализи за конкретните прашања.

Неколку од учесниците ја спомнаа и важноста од донесување на Законот за заштита од дискриминација и улогата која што треба да ја имаат и граѓанските организации и министерствата при подготовка на овој закон.

Министерот Маневски на крајот истакна дека како и до сега граѓанските организации ќе продолжат да имаат клучна улога во подготовката на најголемиот број од законите, а воедно побара и нивна поддршка и проактивност во овие процеси.

На состанокот присуствуваа:

• Асоцијација за демократски иницијативи (АДИ), Лулзим Хазири
• МОСТ, Дарко Алексов
• Македонски центар за меѓународна соработка (МЦМС), Сашо Клековски и Емина Нурединоска
• Национален совет на жените на Македонија – СОЖМ, Савка Тодоровска
• Прва детска амбасада во светот „Меѓаши“, Катерина Коневска
• Полио плус, Звонко Шавревски
• Фондација институт отворено општество Македонија (ФИООМ), Ана Медарска, Наде Наумовска и Тамара Ќортошева
• Хуманитарно и добротворно здружение на Ромите „Месечина“, Мухамед Точи
• Центар за граѓанска иницијатива (ЦГИ), Игор Тасевски