Македонски центар за меѓународна соработка - МЦМС

МЦМС го помогна спроведувањето на првата онлајн анкета Граѓански пулс на ЦИВИКУС-Светската алијанса за граѓанско учество што се одвиваше во периодот од 21 јануари до 8 февруари 2016 година.

Анкетата дава краток преглед на перцепцијата за моменталната состојба во која делува граѓанското општество и се базира на одговорите на вкупно 154 испитаници, претставници на граѓанското општество. Областите кои се опфатени со анкетата се: почитувањето на основните слободи, трендовите на финансирање и влијанието на граѓанското општество во процесите на креирање политики и волонтерските практики. При разгледување на анализата треба да се има предвид дека станува збор за мал примерок чија перцепција не е поткрепена со секундарни податоци кои би овозможиле подлабински заклучоци.

Според прелиминарните наоди, граѓанското општество делува во ограничен простор и се чувствува ранливо главно поради недостигот од заштита од страна на институциите (полицијата, судство итн.). Условите во кои функционираат граѓанските организации во Македонија се негативно оценети т.е. повеќе од 80 % од испитаниците одговориле дека се под просекот. Дополнително 46,1 % сметаат дека условите се влошени во последниот квартал од 2015 година за кој се однесува анкетата.

Анализата на индивидуалните индикатори покажува дека само слободата за пристап и изразување на Интернет (вклучително и социјални медиуми) е оценета над просечно (5.2), а финансиската поддршка (2.7), условите за граѓанска акција (3.0) и правото за слободно делување на организациите без вмешување од страна на државата се најниско оценети (3.1). Значително пониската оцена на општиот индикатор за слободата на изразување (3.3) во однос на другите индикатори, упатува на затвореност на традиционалните канали на комуницирање и организирање, заради што граѓанското општество во Македонија е упатено на Интернет просторот за своите активности.

Од клучните компоненти на граѓанскиот простор, највисоко е оценета слободата на здружување со 4.7 од максимални 10 поени, додека слободата на собирање со 4.0 и слободата на изразување со 3.3. Спротивно на ниската оценка на претставниците на граѓанското општество за условите за граѓанска акција во Македонија (3.0), спремност да учествуваат во трансформативна граѓанска акција постои кај најголем дел од нив.

Граѓанскиот пулс ќе се спроведува квартално на светско ниво, а во регионот на Западен Балкан Македонија е единствата вклучена земја. Целта е да се обезбедат редовни податоци кои граѓанското општество може да ги користи за застапување на сопствените интереси. 

Информации за вклучување во истражувањетои како и за резултатите од него можете да добиете на Оваа е-пошта е заштитена од spambots, треба да вклучите JavaScript за да ја видите , како и преку веб-страницата и социјалните мрежи на МЦМС.

МЦМС беше одговорен за дисеминација на прашалникот и резултатите од одговорите на прашалникот, додека методологијата и анализата на резултатите ја подготви ЦИВИКУС-Светска алијанса за граѓанско учество посветена на зајакнување на граѓанската акција и граѓанското општество низ светот. Граѓанскиот пулс е една од компонентите на новиот Монитор на граѓанскиот простор (Civic Space Monitor), веб-платформа која треба да биде промовирана во Септември 2016 година.