Македонски центар за меѓународна соработка - МЦМС

Преку заедничко делување на сите засегнати страни ќе бидеме поблиску кон победа во борбата против корупцијата. Тоа се заклучоците од денешните панел дискусии одржани денес, на вториот ден на Отворениот форум за антикорупција што е дел од програмите Граѓаните против корупцијата (ГПК)  и Регионалната мрежа за антикорупција (СЕЛДИ). 

Главниот панел беше посветен на одбележувањето на Меѓународниот ден за борба против корупција. Билјана Ивановска, претседателката на ДКСК изјaви дека транспарентноста, чесноста и професионалноста ќе го одбележат нивниот мандат. „Oставам аманет дека секретаријатот треба да продолжи да работи, да се екипира бидејќи ова не е ни половина од капацитетот со кој треба да работи, впрочем тоа е и препораката на меѓународната заедница“ додаде таа. 

Мери-Мадлен Канелопулу, раководителката на операции во ДЕУ, во нејзиниот говор истакна дека борбата против корупцијата е долга, вклучително и за ЕУ, и токму затоа напредокот на ова поле е клучен за приклучување на земјата во ЕУ. Воедно, посочи дека се потребни посветеност и заложби на сите институции, граѓаните, како и напредок во правната рамка. 

„По изминатите случувања видовме дека институциите можат брзо да делуваат и имаат капацитети“, кажа Александар Кржаловски, директорот на МЦМС во неговото обраќање. Воедно, ја потенцира важноста на извештаите на ДКСК и ДЗР и побара да се постапува согласно нивните препораки, како согласно извештаите на граѓанските организации. „Нашиот Извештај за проценка на корупцијата нотира дека корупцијата е број еден проблем според граѓаните, на секој трет човек му било побарано мито, а повеќе од половина милион луѓе учествувале во корупција. Причината за тоа сметаат ¼ од испитаниците е бидејќи така побрзо се завршува работа“ додаде тој. 

Форумот денес понуди  четири паралелни сесии кои беа посветени на борбата против корупција во приватниот сектор, институционалната отвореност кон спречување на корупцијата и состојбата во јавните набавки во Западен Балкан. Организатори на панел дискусиите беа: Стопанската комора на Северна Македонија, Метаморфозис, Транспаренси Интернешнл Македонија, и Балкан Тендер Вач. 

Настанот се заокружи со две сесии водени од медиумските куќи, партнери во програмата и Балкан Тендер Вач. Сесиите беа  посветени на истрагите засновани на медиумски извештаи, како значајна алатка во борбата против корупцијата и недостатоците во системот на корупција во јавните набавки. 

Ова е прв Отворен форум за антикорупција кој се организира како дел од програмите „Граѓаните против корупцијата“ подржана од УСАИД  и „Регионалната мрежа за антикорупција“ подржана од ЕУ.