Македонски центар за меѓународна соработка - МЦМС

Март беше месец на јасни заложби за реформи, визии за образовен и научен развој, но и конкретни активности во заедниците ширум Северна Македонија. Поддржаните организации од Цивика мобилитас продолжуваат да влијаат со својата експертиза, ангажман и непосредна врска со граѓаните.

Своите перспективи за образованието, науката и пазарот на труд ги пренесоа четири истакнати личности во интервјуата кои беа реализирани како дел од проектот „Застапување за инклузивен развој“, спроведен од Форум за разумни политики, Институтот за општествени и хуманистички науки – Скопје (ИОХН-С) и БИРС.

Катерина Колозова од ИОХН-С зборуваше за неопходноста универзитетите да станат дел од индустриските процеси, повикувајќи на трансформација на академијата од формален систем во продуктивен простор за иновации и истражувања.
Али Пајазити од Универзитетот на Југоисточна Европа предупреди дека недостигот на инвестиции во науката и иновациите ја ограничува продуктивноста и ја поттикнува појавата на „лажна наука“. Кристина Ампева од здружението „Гласен текстилец“ говореше за сериозниот дисбаланс меѓу профилите на дипломирани кадри и реалните барања на пазарот на труд.
Ахмед Ќазими, раководител во Министерството за образование и наука, ги презентираше политиките за зголемување на буџетот за наука и зајакнување на меѓународната мобилност преку законски измени и програми како Erasmus+.

Беше подготвена и секторска анализа на младинските политики во Пелагонискиот регион од страна на Про Локал и Младинскиот совет Прилеп, во која беа обработени теми како економски развој, заштита на животната средина и здравствена и противпожарна заштита. Анализата како дел од проектот „Младински политики по мерка на младите“,  ќе служи како основа за креирање локални политики и мерки во сите девет општини од регионот.

Во Струга, Антико, заедно со партнерите Адрион и Секогаш соживот, организираше четири работилници за развој на лидерски и комуникациски вештини кај младите. Учесниците имаа можност да развијат акциски планови за јавни иницијативи во своите заедници, како дел од пошироката цел за активно младинско учество во креирање јавни политики.

Во полето на екологијата, Центарот за климатски промени (ЦКП) беше исклучително активен. Тие поставија канти за селекција на отпад во тетовските училишта, во соработка со Општина Тетово и ЈКП „Тетово“, и одржаа работилници со ученици за важноста на одвојување на хартија и пластика.
Како дел од кампањата по повод Светскиот ден на енергетска ефикасност, ЦКП спроведе активности за подигнување на јавната свест за тоа колку е важно енергетското управување за намалување на аерозагадувањето и животните трошоци.
Истражувањето што го направија со граѓаните, покажа дека 44% би се префрлиле на поеколошки извори на греење доколку добијат субвенции што е јасен показател за потребата од економска поддршка во зелената транзиција.
На нивната Facebook страна се објавени редовни информации за нови пилот проекти во селекција на отпад, средби со институции и активности во училиштата низ земјата.

Паралелно, Центарот за ресурси во животна средина (РЕС), во партнерство со Еко Логик и Флорозон, реализираше практични работилници со ученици од неколку основни училишта. Освен во ООУ „Вера Цири Вири Трена“, работилници се одржаа и со учениците од ООУ „Аврам Писевски“ сите во општина Карпош. Децата работеа во биотехнолошка лабораторија и создаваа пектин од лушпа од јаболка, биофилм од кора од компири и биодизел – учејќи преку директна примена како отпадот може да се претвори во корисни производи. Иницијативата е дел од проектот „Граѓански активизам за остварување на циркуларна економија во управувањето со органски отпад“.

Март беше месец кој ги поврза концептите на одржливост, критичко размислување и граѓанска акција. Грантистите продолжуваат да го поставуваат темпото, да ги отвораат важните теми и да го движат општеството напред, чекор по чекор, со идеи што инспирираат и активности што оставаат трајна промена.