Македонски центар за меѓународна соработка - МЦМС

МЦМС и Светска банка организираа работилница на која околу 100-тина претставници на општините, комуналните претпријатија и другите клучни актери разговараа за проблемите со кои се соочуваат и препораките што ги носи Стратегијата и Акцискиот план.

Работилницата на тема Стратегија и Акциски план за реформи во комуналните претпријатија со фокус на водоснабдувањето, канализацијата и управувањето со цврст отпад се одржа на 26 септември 2008 година (петок), со почеток во 11 часот, во хотелот Александар палас.

Работилницата имаше за цел да се направат консултации со сите клучни актери и да се добие нивното мислење за препораките од Стратегијата за реформи во јавните комунални претпријатија.

На присутните им се обратија Маркус Репник, постојан претставник на канцеларијата на Светска Банка во Македонија, Снежана Костадиноска – Милошеска, Државен секретар во Министерството за финансии, Кристине Кесидес, Раководител на Проектот за подобрување на општинските услуги (МСИП), Светска Банка, лидерот на тимот Питер Робинсон, Economic Consulting Associates (ЕЦА) и Димче Митрески, раководител на одделението за развој во МЦМС,

Светска Банка по барање на Владата на Република Македонија обезбеди грант за подготовка на Стратегија за реформи во Комуналниот сектор. За подготовка на Стратегијата, Светската Банка ангажира конзорциум од меѓународни и домашни советодавни консултанти.

МЦМС беше вклучен во изработка на студијата за Стратегијата и Акцискиот план за реформи во комуналните услуги.

Градоначалниците, претставниците на јавните комунални претпријатија и другите клучни актери разговараат за елементите на Стратегијата, за важноста и потребата од ваква Стратегија, за тоа какви активности треба да спроведе Владата, а какви општините, јавните комунални претпријатија и нивните партнери.