Македонски центар за меѓународна соработка - МЦМС

МЦМС и Институтот за демократија (ИДСЦС) спроведоа истражување со кое беа мерени перцепциите и ставовите на граѓаните во врска со актуелни аспекти на политичката криза, поклонување пред споменикот на ОНА во Слупчане и потребата од извинување. Потребата од истражувањето се наметна со отворањето на јавната дебата за овие случувања. Истражувањето треба да овозможи во неа да се внесат емпириски податоци со што ќе се помогне аргументирано да се оценат општествените случувања во земјата.

Истражувањето покажа дека мнозинство од испитаниците (58%) сметаат дека поклонувањето на споменикот на ОНА во Слупчане, од страна на Министерот за одбрана Фатмир Бесими, не придонесува кон помирувањето во земјата. Гледано низ призмата на етничка припадност процентите се поизразени. Вкупно 74% од испитаниците етнички Македонци сметаат дека постапката на министерот не придонесува кон помирување, за разлика од 80% од испитаниците етнички Албанци кои сметаат дека оваа постапка придонесува кон помирување.

На прашањето дали министерот треба да се извини за постапката, резултатите се слични како на претходното прашање. Вкупно 60% од испитаниците сметаат дека има потреба од извинување, а 29% сметаат дека нема потреба. Скоро осум од секои десет испитани етнички Македонци (78%) сметаат дека министерот треба да се извини. Кај етничките Албанци се забележува обратното, односно осум од десет испитаници (83%) сметаат дека министерот не треба да се извини.

Согласност меѓу испитаниците етнички Македонци (51%) и етнички Албанци (48%) постои за тоа дека кризата во владината коалиција треба да се надмине низ институциите. Вкупно гледано, мало малцинство од испитаниците (15%) смета дека се потребни предвремени парламентарни избори, а во слична мера (13%) е застапено и мислењето дека кризата може да се разреши со нова Влада без ВМРО-ДПМНЕ. Еден од секои десет испитани граѓани (10%) се изјаснил дека не постои криза.

Испитувањето на јавното мислење е направено преку телефонска анкета од страна на ИДСЦС од 14 до 17 септември 2012 г. на репрезентативен примерок од 1.100 испитаници со ± 3 % грешка.