За улогата на вештачката интелигенција во подобрување на граѓанското учество и креирањето политики во дигиталната ера и примената на вештачката интелигенција за подобрување на општественото влијание зборуваапроф. д-р Горан Шибаковски, Декан на Факултетот за Применети ИТ,  и проф. д-р Александар Карадимче, Декан на Факултетот за Информатички и Комуникациски Науки при УИНТ Св. Апостол Павле Охрид.

„Од суштинско значење е да се поттикнуваат организациите да ги користат алатките на вештачката интелигенција, а не да ги сфаќаат како закана од замена на работните места на луѓето“ изјави проф. д-р Карадимче, потенцирајќи  дека „човекот е тој кој на крајот ја валидира, одобрува и ја пушта во јавна употреба содржината добиена од  вештачката интелигенција“. Во тој процес, додаде проф. д-р Шибаковски, „освен стручниот аспект на човекот кој ја валидира добиената содржина, секогаш треба да се мисли и на надминување на предизвиците поврзани со етичноста, приватноста и злоупотребата на истата“.

Проф. д-р Моника Марковска од Факултет за информатички и комуникациски технологии, Универзитет Св. Климент Охридски Битола и претседателка на Здружението за социјални иновации ВР Лаб од Битола зборуваше за важноста на ИТ решенијата и социјалните иновации во корист на зголемување на влијанието и одржливоста на граѓанските организации. Во оваа насока, како добри примери од оваа сфера таа ги истакна проектот за Развој на вештини и изучување занаети во виртуелна реалност, како и проектот за Дигитална инклузија на возрасни Роми кои придонесоа, преку образование од областа на ИТ технологијата и развивање на дигитални вештини и компетенции, да се оспособи возрасната популација и социјално исклучените луѓе да користат достапни електронски услуги во нивните околини и да бидат подобро вклучени во нивните заедници и општества.

М-р Атанас Гоџоски, Директор на ИТ компанијата Ангор АГ презентираше неколку успешни примери за дигитална трансформација во граѓанскиот и во јавниот сектор, примери за успешни дигитални решенија и социјални иновации од областа на телемедицина, иновативен туризам, е-заштита на животната средина и е-алатка за заштита на електрична енергија, имплементирани во Македонија и нивното влијание за постигнување значителни промени.

Г-н Дамјан Дано консултант за дигитална трансформација и основач на Aqtos и IWM Network зборуваше за практичната примена на алатките за дигитална трансформација и потенцијалот на вештачката интелигенција во револуционирање на работата на ГО, особено во областа на автоматизација на повторувачки задачи и ослободување на време и ресурси за стратешки иницијативи, оптимизација на работните процеси и персонализирана комуникација, како еден од начините за создавање на посилни врски со конституентите.

Во вториот дел од настанот, присутните дискутираа за можностите и предизвиците со кои се соочуваат организациите во поглед на дигитализацијата, поврзани главно со: начините за користење на дигиталните алатки во услови кога ГО имаат ограничени ресурси, користење на можностите за работа од „виртуелни канцеларии“, како и етичноста при користење на овие алатки, со посебно внимание на законските одредби поврзани со авторските права на користените извори на информации.

Погледнете ја снимката од дебатата „Дигитална трансформација на граѓанските организации”.

Настанот е дел од проектот „ЕУ поддршка за Граѓански ресурсен центар – фаза 2” финансиран од Европската Унија. Спроведуван е од Националната фондација за развој на граѓанското општество „Граѓански ресурсен центар“, Македонскиот центар за меѓународна соработка, Асоцијацијата за демократски иницијативи – АДИ, Гостивар и Медиа плус, Штип.