Македонски центар за меѓународна соработка - МЦМС

Ова го покажа истражувањето спроведено во три клучни области кое МЦМС го презентираше во новиот Извештај за овозможувачка околина за развојот на граѓанското општество кој се однесува на периодот од јануари до ноември 2014.

Во првата област, основни загарантирани законски слободи, се констатира дека правната рамка е солидна и дека правото и слободата на јавен собир значително се практикува. Сепак, забележани се дневнополитички злоупотреби и изолирани случаи на ограничување на просторот на собирање, користење повеќебројно/ несразмерно присуство на полициска сила на мирни собири.

Во рамки на втората област, финансиска одржливост на граѓанските организации, наодите од истражувањето покажуваат дека државното финансирање, вклучително и средствата генерирани од игри на среќа и забавни игри (лотарии) не е реформирано. Отсуствува институционалната поддршка од државата за граѓанските организации, како и кофинансирање на ЕУ и меѓународни проекти. Граѓанските организации се изедначени со другите правни лица во поглед на даночните закони, т.е немаат олеснувања.

Во третата област, односот меѓу владата и граѓанските организации, се упатува на недостиг од политичка волја за суштинска соработка, и покрај преземените првичните чекори за воспоставување совет за развој на граѓанското општество.

Дополнително, во овој извештај истакната е важноста од задолжително вклучување на граѓанското општество во процесите на подготовка на закони и креирање политики.

МЦМС втора година по ред го издава Извештајот за овозможувачката околина за развој на граѓанското општество кој се заснова на следење на состојбите во националното законодавство и политиките важни за развојот на граѓанското општество во Македонија и нивната примена во пракса.

Извештајот е дел од активностите кои се спроведуваат во рамките на проектот „Аквис (Acquis) на Балканското граѓанско општество - Јакнење на потенцијалот и капацитетите на ГО за застапување и лобирање“, финансиран од Европската комисија и спроведуван од БЦСДН и членките на БЦСДН, во партнерство со Европскиот центар за непрофитно право (ЕЦНЛ) и Европската мрежа на национални граѓански организации (ЕННА).