Македонски центар за меѓународна соработка - МЦМС

Разгледници до Стразбур испратија околу 600 граѓани и политичари
Голем број граѓани, политичари и јавни личности вчера и дадоа поддршка на акцијата на граѓанската иницијатива "Кажи Македонија" за јавно испраќање на разгледници и потпишување на отвореното писмо, со цел да се искаже остар протест против Директивата на Советот на Европа, со која се напаѓа мултикултурниот идентитет на Македонија и со барање да ни се обраќаат со уставното име. Во текот на вчерашниот ден, пред ГТЦ беа пополнети околу 600 разгледници, кои ќе се собираат и групно ќе се испратат до Советот на Европа во Стразбур и до канцеларијата во Скопје.

Разгледниците вчера ги пополнија вршителот на должноста претседател, Љупчо Јордановски, делегација на Социјалдемократскиот сојуз, предводена од Јани Макрадули, кандидатот за претседател од редовите на ВМРО-ДПМНЕ, Сашко Кедев, Ганка Самоиловска-Цветанова и Чедомир Кралевски, како и пратеникот на ДУИ, Талал Џафери. Според претставникот на МЦМС, Александар Кржаловски, акцијата продолжува и во наредните денови од 11 до 14 часот пред влезот на ГТЦ, додека за време на викендот, најверојатно ќе се одржи во Градскиот парк, каде што во рамките на кампањата е можно да се одржи и концерт. Од понеделник акцијата е планирано да се прошири низ целата земја. (Д.Т)

Извор: Утрински весник (16.октомври.2006)