Македонски центар за меѓународна соработка - МЦМС

На 27 мај 2014 година, во општина Желино, се одржа шестата форумска сесија од програмата „Форуми во заедницата“. Присутните имаа можност да слушнат како течела реализацијата на проектот „Изградба на втора фаза на ОУ „Пашко Васа“ во село Ново Село“ што тие го избраа на петата сесија. 

Проектот обезбеди оптимални услови за настава и за работа на учениците и на училишниот персонал. Освен тоа, проектот овозможи подобрување и на условите за хигиена и заштита на здравјето на учениците. Вкупниот буџет изнесуваше 5.008.262 денари од кои 1.400.000 беа обезбедени од Швајцарската агенција за развој и соработка, а 3.608.262 обезбеди општина Желино.

„Ни беше задоволство да бидеме учесници во проектот и што ни беше овозможено заедно со претставниците на општината отворено да разговараме за нашите проблеми и предложените мерки и решенија“, рече Мејреме Алили, наставничка во селото Копачиндол. Таа имала можност да го види новиот објект и посакува брзо да се завршат и другите училишни објекти како тие во селата Копачиндол и Мерово.

Нуредин Лимани, поранешниот директор на реновираното училиште ја оцени како одлична соработката и поддршката на МЦМС и СДЦ како и храброста на општината за вклучување и имплементирање на овој тип на активност. За овој предизвик зборуваше и Шабан Лимани. „Спроведувањето на проектот ни помогна не само финансиски туку и со јакнење на нашите професионални капацитети. Ни помогна да ги зајакнеме релациите со граѓаните, станавме потранспарентни, а тие имаа можност одблиску да ја следат работа на општината и да ги остварат нивните приоритетни потреби и идеи“, рече Лимани. 

На сесијата, претставниците на општината ја презентираа и информацијата за препораките од граѓаните од која можеше да се заклучи дека добар дел од нив веќе се реализирани или се во тек на реализација.

Во име на градоначалникот Фатмир Изаири, на граѓаните им се обрати Сауби Авзиу, раководител на секторот за образование на општина Желино. Тој истакна дека за општина Желино овој проект бил многу важен и дека општината и понатаму ќе работи на решавање на проблемите не само во образованието туку и во другите области со што ќе се подобрат условите за живот на граѓаните.