Македонски центар за меѓународна соработка - МЦМС

Неодамна излегоа од печат две публикации чиј заеднички именител е доброто владеење. Станува збор за Прирачникот за учество на јавноста во процесот на донесување на закони и за Критериумите и постапките за избор на граѓански организации во меѓусекторските тела. Двете публикации се во издание на Набљудувачката мисија на ОБСЕ во Скопје, а нивни автори се Емина Нурединоска од МЦМС и Катерина Хаџи-Мицева Еванс од Европскиот центар за непрофитно право (ЕЦНЛ) од Будимпешта.

Прирачникот е подготвен врз основа на анализа на тема: Транспарентност и учество на јавноста во процесот на подготвување закони: Споредбен преглед и процена на остојбата во Македонија. „Процената на состојбите покажа дека во Република Македонија постојат неколку документи кои ја даваат основата за вклученост на јавноста во процесот на донесување закони“, велат авторките. „Но“, додаваат, „постојат одредени недостатоци во спроведување на одредбите на овие документи. Во практиката, министерствата ја согледуваат важноста од вклученост на граѓанските организации и на други засегнати страни во подготовката на законите и тие настојуваат да обезбедат учество на јавноста. Но, не се бројни примерите кога законите, подзаконските акти или прописите за спроведување се донесуваат со учество на јавноста.“

Критериуми и постапките нудат компаративен преглед и опис на состојбата во Македонија. Публикацијата вклучува примери на постапки и критериуми од Европа, анализа на постојните трендови и постапки за вклучување на македонските ГО во работата на меѓусекторските работни групи или владини тела и предлага можни модели за избор на претставници на ГО, кои можат да се користат како насоки за државните институции во процесите на воспоставување на транспарентни постапки.

Прирачникот е достапен на македонски, на албански и на англиски јазик, а Критериуми на македонски и на англиски јазик.

• Прирачник за учество на јавноста во процесот на донесување закони
• Manual on public participation in the law making process
• Doracak për pjesëmarrjen e opinionit publik në procesin e sjelljes së ligjeve
• Критериуми и постапки за избор на граѓански организации во меѓусекторски тела
• Criteria and procedures for selection of civil society organizations in cross-sector bodies