Македонски центар за меѓународна соработка - МЦМС

Според податоците од „Извештајот за процена на корупцијата во Северна Македонија 2023“, над четири петтини од граѓаните сметаат дека министрите се најкорумпирани (83,4%). Покрај нив, над 80% веруваат дека пратениците, судиите и лидерите на политичките партии се меѓу најкорумпираните професии. Наставниците и банкарите се перципирани како најмалку корумпирани, со помалку од 25,6% и 29,1%. Новинарите (43,7%) и претставниците на граѓанските организации (49,3%) се следните на листата на најниско корумпирани.

Перцепцијата на граѓаните исто така покажува дека корупцијата е најраспространета во судовите и владата. На скалата од еден до пет, 77,6% од граѓаните ја оценуваат корупцијата во судовите со четири и пет. Владата добива 75,6%, парламентот 74,9%, обвинителството 73,2%, додека 70,9% сметаат дека корупцијата е распространета во царината. Од друга страна, армијата и претседателот остануваат со најниска перцепција за вклученост во корупција.

Во 2023 година, 50,7% од граѓаните веруваат дека корупцијата може значително да се намали и искорени, но 47,4% остануваат песимисти. Довербата во МВР (33,9%) и ДКСК (31,2%) расте, но 74,4% имаат делумна или целосна недоверба во владата. Јавното обвинителство (74,3%) и судството (76,0%) се на дното на листата на институции во кои граѓаните веруваат дека може да се справат со корупцијата.

Извештајот за проценка на корупцијата во Северна Македонија- 2023“ , е подготвен од страна на Македонскиот центар за меѓународна соработка (МЦМС) како дел од проектите „Граѓанско општество за добро владеење и антикорупција во Југоисточна Европа: Градење на капацитетите за застапување врз база на докази, влијание врз политиките и граѓански ангажман (СЕЛДИ.нет)“, поддржан од Европската комисија и „Граѓаните против корупцијата“, поддржан од Агенцијата на САД за меѓународен развој (УСАИД)