Експерти и практичари од членките на Балканската мрежа за развој на граѓанското општество (БЦСДН) со поддршка од Европскиот центар за непрофитно право (ЕЦНЛ) изминатите месеци развија матрица за набљудување на овозможувачката околина за развој и функционирање на граѓанското општество.

Матрицата беше за прв пат презентирана на работилницата организирана од БЦСДН на 30 мај 2012 г. во Брисел пред 40-тина претставници на Европскиот парламент, Европската комисија, Европскиот економски и социјален комитет (ЕЕСК), повеќе граѓански организации од Европската Унија (ЕУ) и од Балканот. Учесниците имаа можност да слушнат и да разговараат за целта, примената и процесот на подготовка на матрицата, како и подетална презентација на областите и показателите.

Матрицата ги дефинира принципите и стандардите за развој на граѓанското општество во седум области: основно и фискално законодавство, владини политики и институционална рамка, учество на граѓанските организации (ГО) во носењето одлуки, финансирање, вклученост на ГО во испорака на јавни услуги, човечки ресурси и меѓусебна доверба (со државните институции). Матрицата е направена од ГО за ГО, првенствено како алатка за застапување, за мониторинг и за мерење на развојот на ГО, но и за другите организации и институции. На пример, матрицата може да ѝ служи на ЕК при подготовката на извештаите за напредок на балканските земји. Членовите на Европскиот парламент, како и претставниците на ЕК ја поздравија иницијативата, укажаа на нејзината корисност и дека истата може да се употреби за членките на ЕУ. Всушност, ваков предлог дојде и од Апродев, односно матрицата да биде претставена во рамки на Отворениот форум за ефективност за развој на ГО.  МЦМС учествуваше во подготовката на матрицата (Емина Нурединоска) и на самата работилница (Даниела Стојанова).