На 13 и 14 ноември 2013 година во Нови Сад, Србија се одржа регионална работилница на тема „Финансиска поддршка на државата за граѓанските организации“ што ја организираше Балканската мрежа за развој на граѓанското општество (БЦСДН) во соработка со Европскиот центар за непрофитно право (ЕЦНЛ) и со организацијата ЕХО - членка на мрежата БЦСДН. На работилницата учествуваа 38 претставници од граѓански организации и органи на државна управа од регионот на Западен Балкан и Турција и од државите членки на ЕУ. МЦМС како членка на БЦСДН ја претставуваше Симона Огненовска.

Организациите кои спроведуваат активности за следење на овозможувачката околина за развој на граѓанскиот сектор во рамки на проектот „Acquis на Балканското граѓанско општество - Јакнење на потенцијалот и капацитетите на граѓанските организации за застапување и лобирање“ ги споделија прелиминарните резултати кои се однесуваат на втората област - Рамка за финансиска оддржливост на граѓанските организации.

На работилницата беа мапирани постоечките рамки за финансиска поддршка од страна на државата во балканските земји и беа споделени европските добри практики и тенденции. Започна и подготовката на плановите за застапување во насока на зголемување на поддршката од државата и подобрување на легислативата во земјите.

МЦМС учествува во спроведувањето на проектот. Симона Огненовска зборуваше за постоечкиот систем на финансирање на граѓанските организации од страна на државата, претставувајќи ги добрите практики, како и областите кои треба да се подобрат во следниот период.