Македонскиот центар за меѓународна соработка (МЦМС) подготви инфографик за Онлајн екстремизмот во РСМ при што ги користеше податоците објавени во истражувањето Онлајн екстремизмот во Северна Македонија: политика, етникуми и религија на истражувачите на Мрежата Стронг ситис (Strong Cities Network). 

Од истражувањето се гледа дека екстремизмот како појава во виртуелната сфера постои и кај етничките Македонци и кај етничките Албанци. Од содржините кои имаат карактер на поларизација, омраза и екстремизам, најбројни се наративите со политичка поларизација. Поголем процент од пораките се на македонски јазик (73%). Најголем број од овие пораки се објавени на Твитер (55%), а потоа следуваат Фејсбук и Веб форумите. Околу една четвртина од идентификуваните содржини имаат елементи на етничка омраза. 

За користењето на податоците, МЦМС обезбеди претходна согласност. Самата подготовка е направена како дел од програмата „Пат кон отпорност и реинтеграција на ранливите семејства во заедницата (РРП)“ што ја спроведуваат МЦМС, Нексус – граѓански концепти, Иницијативата за европска перспектива, Плеиадес и Хоризон Цивитас, а финансиски го поддржува Глобалниот фонд за ангажираност и отпорност на заедницата – ГЦЕРФ.