Македонски центар за меѓународна соработка - МЦМС

Капчиња, наметки, детски хокеј палки, ракавици, наочари за сонце беа само дел од подароците кои дечињата од СОС Детското село ги добија од семејството Мареј (Murray) од САД кое е сопственик на познатиот хокеј клуб од Детроит „Ред вингс“. 

Помладиот син Тајлер Мареј (Tyler Murray) беше учесник во програмата „Родум од Македонија 2017“ која Македонскиот центар за меѓународна соработка во партнерство со Обединетата македонска дијаспора ја спроведе трета година по ред во периодот од 23 јуни-14 јули 2017. Оваа програма ги поврзува младите од дијаспората со своите македонски корени преку тринеделен престој во земјата.

Македонските корени ги натераа и останатите членови од семејството Мареј да ја посетат земјата за време на програмата, а нивниот постар син Трој Мареј (Troy Murray), кој е познат уметник во САД, на 6 јули одржа работилница за цртање во СОС Детското село. Повеќе од 25 дечиња учествуваа на неговата работилница и посветено цртаа заедно со Трој. 

Неколку недели подоцна, покрај споменатите подароци, Трој на своите пријателчиња од Македонија им испрати и материјали за цртање за да продолжат заеднички да ја развиваат својата креативност. Децата го поздравија и му се заблагодарија со прекрасен цртеж.